ҚАЗАҚСТАН АРХИВ ІСІ САЛАСЫ ҚҰЖАТТАРЫН ЦИФРЛАНДЫРУ ЖӘНЕ ҚАЛПЫНА КЕЛТІРУ БОЙЫНША ОҚЫТУ КУРСЫ БАСТАЛДЫ

Тамыз айының 4 — 8 аралығында ҚР Ұлттық архивінде Қазақстан Республикасы Мәдениет және ақпарат министрлігінің ұйымдастыруымен, Түрік ынтымақтастық және үйлестіру агенттігінің (TİKA) қолдауымен архив қызметкерлеріне арналған оқыту курсы басталды.

Шараны Мәдениет және ақпарат министрлігі Архив, құжаттама және кітап ісі комитеті төрағасының орынбасары А.М. Дүйсекова, ТІКА басшысы, Қазақстандағы өкілі Фуат Ердоғмуш (Fuat Erdogmuş) және Ұлттық архив директоры С.Е. Нұрланова ашты.

Аталмыш курста Түркия Республикасынан келген Коч Фикрет (KOÇ FİKRET), Балабан Алкан (BALABAN ALKAN), Дедеоғлу Хакан (DEDEOĞLU HAKAN) сынды білікті мамандар дәріс оқиды.

Төрт күнге созылатын біліктілікті арттыру дәрісіне Астана, Алматы қаласындағы 60-қа жуық архив қызметкері қатысып, тәжірибе алмасуда. Курс аясында архив ісін цифрландыру және құжаттарды қалпына келтіру, материалдар мен құжаттарды жіктеу бойынша теориялық және практикалық білім беріледі.