«ӨМІРДІ СҮЙЕМ ЖАНЫММЕН» атты әдеби-сазды кеші

2025 жылдың 3 қыркүйегі күні ҚР Ұлттық архивінде Қазақстанның еңбек сіңірген қайраткері, тұңғыш қазақ тілінде жазылған «Халықтың көші-қоны туралы» заңының авторы, ақын, сазгер Әкім Ысқақтың 65 жылдығына орай «ӨМІРДІ СҮЙЕМ ЖАНЫММЕН» атты әдеби-сазды кеші өтті.

Кешті Халықаралық «Алаш» әдеби сыйлығының лауреаты, ақын «Алжир» мемориалды музей кешенінің директоры Дәулеткерей Кәпұлы жүргізді.

Кеш барысында ҚР Ұлттық архивінің директоры Сағила Нұрланова, ҚР Парламенті Сенаты мен Мәжілісінің депутаттары, мемлекет және қоғам қайраткерлері, жазушылар мен ақындар қатысып, Әкім Ысқақтың елге сіңірген еңбегі мен шығармашылығы жайлы жүрекжарды естеліктерімен бөлісті.

                   

Іс-шара аясында ақынның «Өмірді сүйем жаныммен», «Кім едіңіз?» атты әндерінің тұсауы кесіліп, шығармашылығы мен өмір жолынан сыр шертетін фотоқұжаттар көрмесі ұйымдастырылды. Онда оның әдеби және музыкалық мұралары, баспасөз беттерінде жарық көрген сұхбаттары мен сирек кездесетін суреттері жұртшылық назарына ұсынылды.