Республика күніне арналған «Менің елім – Қазақстан!» тақырыбындағы көрме

2025 жылғы 23 қазан күні ҚР Ұлттық архивінде Астана қаласы, «Есіл» ауданының әкімдігі мен «Аmanat» партиясы Есіл аудандық филиалының бірлесіп ұйымдастыруымен Республика күніне арналған «Менің елім – Қазақстан!» атты көрменің ашылу салтанаты өтті.

Көрменің мақсаты – Республика күні мерекесінің тарихи маңызын айқындап, тәуелсіз Қазақстанның даму жолындағы маңызды кезеңдерді архивтік құжаттар арқылы жұртшылыққа таныстыру. Көрме аясында егемен еліміздің қалыптасуы мен жетістіктерін баяндайтын сирек архивтік материалдар мен фотоқұжаттар ұсынылды.

 Салтанатты ашылу рәсіміне ҚР Ұлттық архивінің директоры С.Нұрланова, Астана қаласы «Есіл» ауданының әкімі Д.Қыдырбек-ұлы, Мемлекеттік, банк мекемелері және қоғамдық қызмет көрсету қызметкерлері салалық кәсіподағының төраға орынбасары А.Бекназарова, сондай-ақ «Amanat» партиясы Есіл аудандық филиалының төрағасы С.Жүсіпова және Ұлттық архив қызметкерлері қатысты.

Іс-шара барысында қатысушылар Республика күні мерекесінің мәні мен ел тәуелсіздігінің тарихи жолы туралы пікір алмасты. Көрме экспозициясы арқылы келушілер Қазақстан Республикасының қалыптасуы мен даму тарихына шолу жасап, архив қорының бай мазмұнымен танысу мүмкіндігіне ие болды.

Бірқатар архив қызметкерлері Республика күні мерекесіне орай Құрмет грамоталары және Алғыс хаттармен марапатталды.