Жаны – жібек, жүрегі – жалын Ғабдуллин

Бүгін Кеңес Одағының Батыры, академик, жазушы, қоғам қайраткері Мәлік Ғабдуллиннің туғанына 110 жыл. Қазақстанның еңбек сіңірген қайраткері, филология ғылымының докторы, профессор, Қазақстанның әлеуметтік ғылымдар академиясының академигі, ҚР Ұлттық архивінің жеке қор иесі Серік Негимов батырлардың тұйғыны, ғалымдардың жүйрігі болған Мәлік Ғабдуллиннің өмір жолын зерттеуге 40 жылға жуық уақытын арнады.

С.Негимовтың жеке қорында Алтайдың ақиығы, алапат айқастың ардагері болған М.Ғабдуллиннің «Майдан дәптерінен» бастап, хаттары мен күнделіктерінен, газет-журналдарда жарық көрген мақалалар, оның қайраткерлік, санаткерлік істері, шығармашылық өмірбаяны жөнінде көптеген архив деректері мен замандастарының естеліктері сақталған. Қор иесі 2001 жылы аталған құнды мәліметтер негізінде «Мәлік Ғабдуллин» атты зерттеу еңбегін жазып шықса, 2015 жылы бұл филологиялық-деректанулық зерттеуді екі есеге кеңейтті.

«Иә, ол жастайынан естілігімен, елгезектігімен ел көзіне түскен жас жайнақтың өзі, қас жақсының көзі еді. Мәкең Отан соғысында өзінің ержүрек батырлығымен халқының сүйіспеншілігіне бөленсе, бейбіт уақытта ғалым,жазушылығымен еліне ерекше қадірлі болды», деп «Жаны – жібек, жүрегі – от, қадамы – құт баһадүр» ұстазын ерекше ықыласпен еске алады С.Негимов.

Қор иесінің құжаттар қатарында еш жерде жарияланбаған М.Ғабдулиннің мазмұнды хаттары мен басқа да аса құнды деректері сақталған. С.Негимов Мәлік батырға байланысты бірде-бір деректі назардан тыс қалдырмай, жүздеген ғылыми, әдеби-сын мақалалар дайындап, әртүрлі басылым беттерінде жариялады.

Серік Негимовтің ұлттық сөз өнерінің бейнелігімен адамгершілік-ұждандық, тұлғалық мәселелерді жаңашылдықпен тал­даудағы жетістіктері, жалпы ғылыми-зерттеушілік ой-пікірге қосқан өлшеусіз үлесі әдебиеттану ғылымында мәңгі жасайтыны анық.

Ал, Кеңес Одағының батыры, профессор, халық әдебиетінің білгірі, жазушы, әскери мемуарист Мәлік Ғабдуллиннің қайраткерлік, қаһармандық, ұстаздық еңбегі, шығармашылық өмірбаяны, адамшылық болмысы мен кісілік келбеті өскелең ұрпақ үшін үлгі-өнеге болып қала бермек.