ҚР Ұлттық архиві мен Франция Ұлттық кітапханасы өкілдерінің ресми кездесуі

21 тамыз күні Қазақстан Республикасының Ұлттық архивінің директоры Нұрланова Сағила Есімсейітқызы Франция Ұлттық кітапханасының (BnF) Еуропалық және халықаралық байланыстар директоры Жан Франсуа Розо мырзамен және Халықаралық сараптама жобасының жетекшісі Франческа Бальди ханыммен ресми кездесу өткізді.
Кездесуге Архив, құжаттама және кітап ісі комитетінің төраға орынбасары Дүйсекова Алтынай Маратқызы, Ұлттық архив қорын пайдалану және мемлекеттік қызметтер басқармасы басшысы Даулетбаева Хорлан Дауреновна, Мемлекеттік саясат және нормативтік құқықтық реттеу басқармасының бас сарапшысы Несипбаев Асет Сарсенович және Ұлттық архив басшылық құрамы қатысты.
Кездесу барысында тараптар архив ісін дамыту, тарихи құндылықтарды сақтау, құжаттарды цифрландыру және қолжетімділікті арттыру мәселелерін талқылады. Негізгі мақсат – Қазақстан мен Франция арасындағы мәдени, тарихи және ғылыми ынтымақтастықты тереңдету және архив ісі саласындағы тәжірибе алмасуды жолға қою. Қос елдің архив пен кітапхана арасында құжаттарды сақтау, цифрландыру және қолжетімділікті арттыру бағытында өзара ықпалдастық орнату көзделді.
Кездесу нәтижесінде екі тарап архивтік құжат айналымын жетілдіру, цифрлық архивтерді дамыту және ортақ мәдени мұраны сақтау бағытында өзара түсіністікке қол жеткізді.
Бұл кездесу – жаһандану жағдайында ұлттық мұраны сақтау мен оны келер ұрпаққа жеткізудің маңызды қадамы. Архив саласындағы халықаралық әріптестік заманауи технологияларды тиімді пайдалану арқылы тарихи мұраны сақтау ісін жаңа деңгейге көтеруге мүмкіндік береді.

(Франция Ұлттық кітапханасының (BnF) Еуропалық және халықаралық байланыстар директоры Жан Франсуа Розо мырзамен және Халықаралық сараптама жобасының жетекшісі Франческа Бальди ханым, Астана қ., 2025 жылғы 21 тамыз. Фото авторы И.Ф. Бургандинов., ҚР Ұлттық архиві)

IMG_3452