Ә.Х.Досахановтың «Денге саулық, дертке шипа сыйлаған» атты жеке қорының ашылу салтанаты өтті

2023 жылдың 23 маусымы күні Қазақстан Республикасы Ұлттық архивінің ұйымдастыруымен Қазақстанның еңбек сіңірген қайраткері, отандық онкология саласының білгірі, медицина ғылымдарының докторы, профессор Әлихан Хамзаұлы Досахановтың «Денге саулық, дертке шипа сыйлаған» атты жеке қорының ашылуына арналған салтанаты өтті.

***

***

Іс-шараға Қазақстан Республикасы Мәдениет және спорт министрлігі, Архив, құжаттама және кітап ісі комитетінің төрағасы Қуат Бораш Қаһарманұлы, химия ғылымдарының докторы, академик Газалиев Арстан Мауленұлы, Алаштанушы ғалым Жүсіп Сұлтан Хан Аққұлұлы, Алашорда қайраткері, дәрігер Бисенов Бақтығалидың /Бәкиш/ қызы Бисенова Роза Бакишқызы және басқа да қоғам және мемлекет қайраткерлері қатысып, қор иесі туралы естеліктерімен, тың деректермен бөлісті.

***

***

Архив қызметкері,Жазушылар одағының мүшесі, ақын Ахат Расул ғалымға арнап жазған жырын оқып берді.

Әлихан Хамзаұлы еңбек жолын 1966 жылы Алматы қаласының 2-ші қалалық клиникалық ауруханасының хирургия бөлімшесінде мейір иесі болып бастап, Қазақ онкология және радиология ғылыми зерттеу институтында еңбек жолын жалғастырып медицина ғылымдарының докторы, профессор, академик деңгейіне дейін көтерілді.

Әртүрлі қатерлі ісіктердің сәулелік терапиясымен айналысатын үш құрылымды қосатын ірі клиникалық радиология бөлімінің жетекшісі қызметін атқарды. Әлихан Хамзаұлы онкология және радиология ғылыми зерттеу институты ғалымдарының ғылыми жұмыстарының қорытындыларын тәжірибеге енгізу, ауыр науқастарды тиімді емдеу тәсілін жүзеге асырды. Жарты ғасырлық адал қызметі, ұлт денсаулығын жақсарту және елімізде медицина ғылымын дамыту жолында сіңірген өлшеусіз еңбегі еленіп, «Қазақстанның еңбек сіңірген қайраткері» құрметті атағымен, 2015 жылы «Құрмет» орденімен және медальдармен марапатталды. «Денсаулық сақтау ісінің және медицина ғылымының дамуына қосқан маңызды үлесі үшін» шетелдік «HIPPOCRAT», «AVICENNA», «ПИРОГОВ» ордендерінің кавалері атанды. П. М. Поспелов атындағы және ҚР Ұлттық медицина ассоциациясы медальдарымен қоса «Алтын дәрігер» атағы берілді.

Әлихан Хамзаұлының жас ұрпаққа асыл қазына ретінде жазған туындыларының бірі «Алғашқы Алаш дәрігерлері» атты кітабы. Бұл кітап патриотизмнің, азаматтық және дәрігерлік борышқа берілгендіктің үлгісі болып табылатын керемет туынды. Онда алғашқы дәрігерлердің «Алаш» ұлт-азаттық қозғалысының қызметіне, «Алаш-Орда» үкіметінің жұмысына пәрменді қатысуы көрсетілді. Көрнекті халық емшілері туралы очерктер, алғаш рет КСРО мен Қазақстанның жоғары ғылыми дәрежелері мен атақтарына ие болған медицина ғалымдары мен дәрігерлері туралы, екінші дүниежүзілік соғыстың батыл қыз дәрігер батырлары мен офицерлері туралы очерктер ұсынылды.

***