Ұлттық құрылтай – тарих пен болашақты жалғастырған маңызды мінбер

Қызылорда қаласында өткен бесінші Ұлттық құрылтайда Мемлекет басшысы айтқан мазмұнды баяндама еліміздің рухани және тарихи дамуының жаңа бағыттарын айқындап берді. Президент атап өткендей, аз ғана уақыт ішінде ауқымды жұмыстар атқарылып, Әділетті, Қуатты, Қауіпсіз әрі Таза Қазақстанның берік негізі қаланды. Бұл жетістіктер – ел бірлігінің, ортақ мақсат жолындағы табанды еңбектің айқын көрінісі.

Мемлекет басшысы өз сөзінде ұлттық тарих пен мәдени мұраны сақтау ісіне айрықша мән берді. Әсіресе «Хандар шежіресі» қолжазбасының ЮНЕСКО-ның «Әлем жады» тізіміне енгізілуі, көне қалалар мен тарихи ескерткіштерді зерттеу, археологиялық мұраларды жүйелеу, ұлттық жәдігерлерді халықаралық деңгейде насихаттау жөніндегі бастамалар – архив саласы үшін ерекше маңызды. Бұл бағыттар Қазақстан Республикасы Ұлттық архивінің алдағы қызметінің басты бағдарларымен толық үндеседі.

Президент көтерген «Ұлттық цифрлық мұра» қорын қалыптастыру идеясы – архив ісін дамытудың жаңа кезеңін білдіреді. Құжаттарды цифрландыру, ғылыми айналымға енгізу, электрондық базаларды кеңейту, жасанды интеллект мүмкіндіктерін пайдалану арқылы архив деректерін қолжетімді ету – бүгінгі күннің басты талабы. Ұлттық архив осы міндеттерді жүзеге асыруға толық дайын және бұл бағыттағы жұмыстарды жүйелі түрде жалғастыра береді.

Сондай-ақ Мемлекет басшысының тарихи сананы жаңғырту, ұлт жадын сақтауға бағытталған бастамалары архив саласының қоғам алдындағы жауапкершілігін одан әрі арттыра түседі. Өйткені архив – өткен мен бүгінді, тарих пен болашақты байланыстыратын алтын көпір. Ұлттық құрылтайда айтылған ойлар осы ақиқатты тағы бір мәрте айқындап берді.

Алдағы уақытта да Ұлттық архив еліміздің тарихын жүйелеу, құжаттық мұраны сақтау және оны келер ұрпаққа жеткізу жолында Мемлекет басшысы айқындаған міндеттерді табанды түрде жүзеге асыра бермек. Ұлттық құрылтай мінберінен көтерілген бастамалар біздің ортақ ісімізге тың серпін беретініне сенімдімін.