Ұлттық архивте цифрлық технологияларға арналған оқу семинары өтті
2026 жылғы 16–17 сәуір күндері Қазақстан Республикасы Ұлттық архивінде «Цифрлық технологиялар: архивті толықтыру, архивтік құжаттарды есепке алу және сақталуын қамтамасыз ету» тақырыбында оқу семинары өтті.
Семинарды Қазақстан Республикасы Ұлттық архивінің директоры С. Нұрланова және Архив, құжаттама және кітап ісі комитеті басқармасының басшысы С. Тащанова ашып, архив саласын дамытудағы цифрландырудың маңыздылығына тоқталды.
Бағдарлама аясында мемлекеттік органдарда құжаттарды цифрландыру, жасанды интеллект технологияларын енгізу арқылы басқару процестерінің тиімділігін арттыру, электронды архивтің мүмкіндіктері, іс-қағаздар номенклатурасын қалыптастыру, мемлекеттік есеп пен мемлекеттік қор каталогын жүргізу, сондай-ақ ақпараттық қауіпсіздік саласындағы нормативтік-құқықтық актілер мәселелері жан-жақты қарастырылды.
Іс-шара соңында қатысушыларға архив жұмысымен таныстыру экскурсиясы ұйымдастырылып, семинар қорытындысы бойынша тыңдаушыларға сертификаттар табысталды.
